khayaal e be-wajah

Dayaar e dil kabhi choda hi nahin
Un ke siwaa kisi ko dekha hi nahin

But-e-nazuk nigaah bahut aaye lekin
Dil e wehshi pe asar hua hi nahin

Is daud e musalsal jise zindagi kahein
Deenaar-e-ilm dene ka naam leta hi nahin

Firaq ajeeb zehar bo gaya hai dil mein
Ek aarzoo tak waan khilta hi nahin

Suna hai khojne chale hunar ko khalq
Maazoor sa koi ab tau raha hi nahin

shehr e dilli

Is shehr e be murawwat ka koi pechida mod tha shaayad
Meer o ghalib bhi phirte the, kisi aur zamaana shaayad

Ab jo dekhun to auraq e mussawir sa nahin koi
sirf ek boo e hawas hai jo dhulke khulega.. shaayad

Par kaun saa aayega woh abr e mehrbaan idhar se
badal degi har nek-jaan ki neeyat yaan hawaa shaayad

phir bhi is kooche ke ek kone mein sajaata hoon main bhi
chand tinke jinhe aur koi na aashiyaan samjha shaayad

apni roz o shab bhi guzarte hain haal-o-behaal idhar
maazoor e naadaan ne isi ko jeena jaana shaayad

saaqi e jaan nawaz

Zehr e halaahal ko mai-e-gulfaam banaake pilaao saaqi
Kushta-e-mehrbaani-e-duniya hoon baahon mein samaa lo saaqi

Woh sai-e-karam-e-beqaraan farmaao, badhaao haath, sambhaalo saaqi
Larzish e paa e maazoor ka mujh hi ko sazaa kyun ho saaqi

Fitrat mein utarti nahin soorat e barbaadi e dehar ab tau
Yeh tere labon ka muskaan nahin ke jo phir se sajaa do saaqi

Badan tau jalke khaak hui, aag e ishq bewajah lagaaya dil ne
Aab e rawaan jhalaktee hai jis me, woh hansi se bujhaa do saaqi

Raunaq e rang-e-baazaari mein sajti hai duniya saari
Raahat e siyaah e zulf e pur-pech phir se phailaao saaqi

Phir aa gaye hain chand tukde dil e maazoor thaame hue
Khoobi e shamsheer e nazar phir se hum pe aazmaao saaqi

Tham sa gaya hai aake tere dar pe kaar e dil e maazoor
Tere saans pe madaar duniya hai, phir kaar e jahaan rawaan ho saaqi

saheb..

Ham bas khayaal o khwaab mein jeete hain saheb
Ek silsila e saans yun hi baandhe hain saheb

Bin pyaala o sharaab, mast hi phirte hain saheb
Jaayein jidhar bhi aapko liye chalte hain saheb

Aab o hawaa e dehar se bezaar ho chale
Mile jidhar baada e nazar, pee hi lete hain saheb

Dil e muztar ki khwahishon se parhez kare hain
Aise jeene ko koi nadaan hi jeena kahe hain saheb

Gharq e hujoom e hawadis ho hi jaate lekin
Bas aap ki dua hain, hum jee lete hain saheb

Aapke kadmon pe sar lagaaye hue tau hai
Banda hun magar nacheez kise kahe hain saheb

Mazoor e muztar liya phirta hain hasham sa aksar
Majlis e weeraana hum khoob sajaate hain saheb

Apni hasti

Us nigaah e naaz ke paaband hai hum
Aah e narawaan ke maanind hai hum

Sochte hain ke kuch kar guzre magar
Unhi ke fikr o zikr mein band hai hum

Phirta tau aasmaan bhi hai, phir un ka kya
Ab ke bahaar mein, naapasand hain hum

Dekh dekh ke ghat-taa hai mol yahaan
jigar apna, jo har haal mein buland hain hum

Aadam e dozakh o khuld koi aur tha lekin
khoob hain, khaak-o-khoon harchand hain hum